經常長時間在電腦面前打字，日子有功，難免打出一身腰痠膊痛，痛楚難當時或會拿塊膏藥布貼患處。藥理學專家強調，膏藥布僅能抗緩痛症，無法根治，隨時可引發藥物過敏；而有「蠶豆症」患者如將含樟腦及薄荷成份的膏藥布貼上身，更會有溶血現象，嚴重者會昏迷甚至死亡。
記者：蔡俊業
攝影：林栢鈞
模特兒：Suki@PureModels
【神經末梢】（NerveEnding）
外圍神經系統的末梢部份，神經細胞就是借此和體內各種組織或器官聯繫，可分感覺神經末梢和運動神經末梢，前者接受外界或體內刺激，後者則把神經衝動傳播到肌肉和腺體組織，令它們運動和進行分泌。
乜人不宜使用？
‧孕婦
‧小童
‧濕疹患者
‧過敏體質人士
正確使用膏藥布
‧使用時間約8-12小時
‧貼膏藥布期間忌吃生冷食物
‧盡量貼在沒毛髮的皮膚上
‧別重複多次貼在同一位置
‧撕開膏藥布後應清洗皮膚
‧可剪一小塊貼手測試反應
‧若出現皮膚過敏，應即時停用膏貼
膏藥布可能引起的反應
‧紅疹
‧面腫
‧口腫
‧呼吸困難
‧心跳加速
‧喉嚨腫脹
‧死亡
‧蠶豆症患者可引發急性溶血現象，導致身體組織死亡及昏迷
有機會急性溶血
「蠶豆症」（Favism），全名「葡萄糖六磷酸鹽去氫酵素缺乏症」（Glucose-6-PhosphateDehydrogenaseDeficiency），又稱「G6PD缺乏症」，是常見的先天性代謝疾病，現時全球約超過2億人罹患此症，暫時無法醫治。那跟使用膏藥布有何關連？原來患此症的人吃過蠶豆後會出現急性溶血現象，即紅血球不正常分解，由於紅血球負責傳送氧氣至身體各部位，嚴重的溶血反應可引致身體組織死亡，昏迷甚至危及生命，因而得名。註冊中醫師彭明慧說，葡萄糖六磷酸鹽去氫酵素原為紅血球中一種正常酵素，功能是減少紅血球受氧化侵襲時不被破壞！患有G6PD缺乏症的人，除了進食蠶豆會出事外，「當患者接觸到如薄荷、樟腦等物質時，都同樣會造成急性溶血現象！」所以含此類成份的膏藥布，對患者來說是個偌大的健康陷阱。
蒙蔽神經末梢
走進店舖貨架，隨意找來幾個品牌的膏藥布，看看背後的成份資料，都會發現含樟腦（Camphor）和薄荷醇（Menthol），香港醫院藥劑師學會副會長崔俊明指出，坊間有售用以舒緩肌肉痛症和治關節痛的膏藥布都會有這兩種成份，「樟腦係令膏藥布有種味道，而薄荷醇就令用者有凉快感覺。」他認為，這些膏藥布雖然能夠暫時舒緩身體痛楚，但「心理功效」多於「實際功效」，「薄荷同辣椒膏藥布，兩樣都係以冷同熱去蒙蔽神經末梢嘅痛楚感覺，再加上味道，令用者心理上覺得患處唔再痛，其實無醫治效用！」他還說各種膏藥布都有藥性，用者可能會事後出現藥物敏感；記者買了6款不同牌子的膏藥貼，發現當中4款都有英文字Salicylate，崔俊明說：「Salicylate即水楊酸，呢幾款牌子含嘅『水楊酸甲酯』同『乙二醇水楊酸酯』等，都係同一類成份，膏藥布就係靠佢嚟止痛，而用者就正正對呢種物質反應過敏。」
真實個案
發炎紅腫求診4次
現年39歲的阿恒，10年前曾遇到一次使用膏藥布的慘痛經歷。當時他因做gym時不慎扭傷膊頭，於是購買膏藥布貼在兩邊膊頭。「貼咗大約3個鐘後就出事，初初覺得膏藥布貼嘅位置好熱同好痕，於是我立即將佢搣走，發現皮膚表面已經紅晒，於是我用水清洗。」以為情況有好轉，豈料一覺醒來發現未有改善，遂求醫了解，「醫生話因為我對膏藥布有藥物敏感，毛孔全部閉塞晒而且發炎，要打針同搽藥膏先消腫，真係無諗過會咁！」結果前後共求診四次，花了二千元，自此以後從未再用膏藥布。
孕婦有流產危機
崔俊明說，人體對任何藥物都可以出現過敏情況，「如果敏感，患者會出現皮疹，即係皮膚表面會紅腫同起紅疹，亦會覺得痕，情況嚴重就會面腫、口腫，呼吸困難同心跳加速，更可能出現喉嚨腫脹，令患者呼吸困難而死亡！」由於事前並無預防方法，為減低風險，崔俊明認為最好用其他方法代替膏藥布，「最簡單係用冰袋或熱敷，又或者搽藥膏同打針。當中，打針係最快見效。」皮膚科醫生史泰祖則認為要視乎情況而定：「若情況輕微，用膏藥布就無所謂，但若嚴重嘅就當然要睇醫生，正常情況下醫生好少會用膏藥布，因為打針一定快過貼膏藥。」他續說，病人不但會對膏藥敏感，對藥貼上的膠質亦可能會有過敏反應。中醫師彭明慧則強調孕婦不適宜使用，因絕大部份膏藥都有「破氣、活血、化瘀」之用，入藥的以紅花、田七、乳香、沒藥等成份為主，「若破咗氣，身體就會虛弱，如果係孕婦就有可能因為子宮收縮而造成流產，所以孕婦應該禁用。」
