港股噚日嘅走勢同預期相符，花旗股市上禮拜五炒高，噚晚休市，港股好友大戶攻破21000關後一路推上，恒指靠近全日高位收市，報收21355，升幅384點，短線阻力區在21500至21800，睇技術指標同成交，港股短線仍然係反覆炒上格局。
指數靠近阻力區，市況會轉炒個別，氣氛仍會熱鬧，優先考慮金融同保險股。
中銀C輪21825：中銀香港（2388）噚日報收22.35元，升3.4%。中銀股價升破保歷加通道之後整固1日又再炒過，買盤積極，短線破23.60元推向25元嘅機會唔細，可以諗吓隻C輪21825。
隻輪現價25仙，2010年12月22日到期，行使價19.88元，溢價0.1%，引伸波幅25.8%，槓桿率8.9倍（有效7倍），正股升上25元，21825睇48.9仙，正股跌穿21.60元就沽咗隻輪。
俊樺