金庸嘅武俠小說影響幾代華人，但以前口痕友批評佢淨係識老作，唔識歷史。金庸最近終於以86歲高齡，攞咗英國劍橋嘅歷史學博士，係佢埋首中國史學嘅成果，同過往表揚佢文學成就嘅銜頭不可同日而語。
八方噚日致電查良鏞嘅明河社辦公室，職員話佢家身在香港，但謝絕傳媒訪問。查良鏞創辦嘅《明報》噚日引述消息報道，佢05年去劍橋做高齡碩士生，專門研究唐朝正野史，同細佢15年嘅漢學大師麥大維亦師亦友，07年讀埋博士，今年修成正果，完成博士論文，獲頒哲學博士學位，但仲未戴四方帽行畢業禮。資料顯示，劍橋最老博士生係位91歲嘅英國退伍軍人。