提供新聞搜尋服務嘅慧科Wisenews，多年來同中港台1,600間傳媒機構合作，將報紙雜誌內容上網，方便用戶搵料。不過呢種合作關係可能生變，事緣慧科推出名為WiseLearning嘅通識科教材，將報紙提供嘅新聞、社論整理後賣畀中學，有報館認為利益受損，聽聞報業公會多個會員已去信要求慧科「做啲嘢」。
包裝做通識科教材
慧科稱現有200間中學幫襯WiseLearning，有報館高層指提供內容畀慧科，只係做網上剪報生意，慧科再包裝做通識科教材，即係「撈過界」，與部份將新聞材料編成通識教材嘅報館變成競爭對手，因此呢啲報館特別勞氣。
有報館高層透露，多間報館已提出異議，但慧科不以為然，報業公會日內會開會討論。八方聽聞，有報館高層聲稱不排除結束同慧科合作關係。報館起義對抗慧科非一日之寒，報界高層指同慧科合作條款苛刻，而使用慧科服務卻不便宜，可用「不平等條約」嚟形容，小道消息指有報館甚至派人上去睇數。（《蘋果》唔係報業公會會員。）