利物浦前日幫老臣子加歷查搞咗場慈善賽，謝拉特同奧雲為撐老友同埋佢個慈善基金，都有喺呢場利記大勝愛華頓邀請隊4:1嘅群星拱照加歷查賽事亮相。加歷查仲搶埋奧雲個12碼嚟射，呢位穩陣先生真係可能一世仔都未試過咁威！
前日吸引超過35,000球迷捧場嘅慈善賽，可謂星光熠熠。利記嗰邊有祖高爾、賴恩巴布、高捷斯基、杜迪克、希斯基、路爾斯加西亞等新舊紅軍壓陣。連喺英格蘭集訓營嘅謝老四，都專登向領隊卡比路請假，返嚟以正選姿態踢咗10分鐘。奧雲亦唔話得，夠膽以曼聯前鋒兼利物浦叛徒嘅身份，着番紅軍10號波衫重返晏菲路比賽。拖肥糖亦唔輸蝕，由莫耶斯領軍，有阿迪達、耶高保、巴尼斯等現役球員撐場，加歷查喺利物浦市果然江湖地位十足。
講番場波，有路爾斯加西亞打開紀錄嘅利記，完半場前奧雲禁區內起腳省中愛華頓球員隻手博到12碼，加歷查就衝上前搶住射，奧雲仲笑笑口將操刀機會讓畀加歷查，等呢位老友射成2:0。
換邊後祖高爾同新秀艾利斯頓各入一球；但講到最搞鬼嘅，就係愛華頓破蛋嘅一球，竟然係加歷查快愛華頓嘅耶高保一步，射入「烏龍12碼」，佢「梅開二度」之餘，利記亦得以包辦今場5個入球。
驚球迷殺奧雲
踢咗利記16年嘅加歷查賽後仲為搶射12碼而解畫：「如果我唔搶奧雲個12碼嚟射，我驚現場球迷會殺咗佢。我細個係愛華頓球迷，射入利物浦龍門亦係我嘅夢想。」佢仲希望能藉今次賽事同賽後晚宴，為其「23慈善基金」籌到100萬鎊。另外，阿士東維拉希望喺周日起48小時內，請前利物浦領隊侯利亞出任新帥，難怪佢前日重返晏菲路睇波時亦春風滿面；不過求大俠聽講禾諾克同費度兩位維拉球員就唔多高興。鬼咩，佢哋當年都曾被侯利亞掃出晏菲路，家陣侯生隨時又做番波士，分分鐘輪到佢哋要諗轉工。