胎打滑超型入彎，喺《頭D》拓海身上就叫飄移，但換轉你同我就係「失控」，千祈咪亂試。自以為技巧高超？當你試過駕駛學院嘅「八爪魚」，就知濕地失控話咁易，除咗O嘴踩死Brake錯晒動作外，好彩仲有專人教你點救車。意外嘅嘢，預早學識點處理，分分鐘救番你一命！
記者：徐影龍
攝影：陳盛臣
Model：Suki@GMEModels
救車超錯 靚女狂嗌
我承認有點機心，專登揀個有車牌嘅Model做爛頭卒，試吓駕駛學院個失控體驗，等我睇定環境先再出手。Suki揸車經驗唔算少，見到個場唔算大，上車前仲滿有信心話唔驚。點知先試Level1打滑，兜第一個圈已經失控，升到Level5，尾轆離地無晒抓地力，卒之架車不停白鴿轉，車內就充斥靚女尖叫聲，情形就好似以前荔園騎電動蠻牛咁，充滿美女與野獸嘅暴力刺激。梗係啦，扭軚過多、視線錯誤兼踩死Brake等大忌全部犯晒，好彩個模擬失控系統夠安全，仲有專業導師跟車，大夥兒先可安全落地，返屋企裝香還神。
咪笑人呀，失控打滑情形隨時出現，包括橫風橫雨過急彎、滿地沙石亦會打滑，甚至車禍現場留下唔顯眼嘅玻璃碎等，統統都好易發生「白鴿轉」意外，揸車之人隨時都有機會遇到。
甩尾自救
10級打滑「級級」可危
呢套失控危機處理，係駕駛學院進階課程之一，正式名稱叫防衞駕駛，見到架Corolla四邊伸出輔助轆，成隻「八爪魚」咁，就係由瑞典引入、全亞洲獨有嘅升降設備，能獨立升降而令車輪離地，模擬出輪胎無晒抓力嘅失控情形，包括最常見嘅「推頭」同「甩尾」，即係轉向不足或轉向過度。一共10級升降程度，去到第7級，已經好似氣墊船喺水上飄咁滑溜，若然無學過救車，我諗大家都好似Suki咁得個嗌字，意外往往就係咁發生。
據謝Sir講解，當失控甩尾時有幾樣嘢必須做，第一係減低車速，令車身前後平衡，視線要望向正確逃離方向，軚盤依着視線轉向，定住油門增加抓地力，絕不能踩死腳掣，最後慢慢逃離出彎。成套課程軟硬件都配合得好好，難怪成為唯一亞太地區能加入「歐洲駕駛訓練總會」（EFA）嘅機構。當然，齋明理論係無用嘅，唔親身經歷八爪魚訓練，你根本唔會知道幾時應該做啲乜，要學就正經啲報名，千祈咪匿埋亂試呀！
香港駕駛學院防衞駕駛課程
內容：包括理論、訓練及應變等三種課程
費用：$860-$990
查詢：28666682