由於經紀H間行冇期權買賣，所以敏妮用開另一間經紀行買賣期權，呢間行喺行內好出名做期權，原因係佢哋自己開發咗套system，方便投資者落盤買賣。不過，敏妮日日對住部大利市機，要睇報價好方便，加上工作繁忙，唔係經常落盤，好多時都係心血來潮先打電話落盤，所以好少用佢哋嘅網上系統；自從間行要求每月成交唔夠數嘅客，用網上系統要畀月費，敏妮已經cut咗網上服務。
佣金鬥平 每單交易5蚊
不過，網上做trade已經越嚟越普及，由此衍生係經紀佣金向下調。前一排敏妮搵公司電腦部同事幫手時，佢猛問有關股票期權投資嘅問題，原來呢班I.T.人好熱衷炒股，家陣仲迷上咗期權，但係對股票期權投資無把握，所以操盤都係細細注，有時賺埋都唔夠畀佣，所以不斷發掘平佣嘅經紀行。
佢介紹咗間網上經紀行畀敏妮，賣點係每單交易定價5蚊佣，無論買入定沽出、股票期貨定期權，都係定額5蚊佣。I.T.同事仲話，由於佣金低，有啲朋友喺網上落盤直情好似打機咁，細細注但轉身快。
講開呢類以平佣作招徠嘅股票行，專做網上同手機落盤，需要嘅人手好少，主要係套交易系統嘅固定成本，只要夠多客，而啲客又夠多trade嘅話，就已經有可觀回報。不過香港地，「瘦田無人耕，耕開有人爭」，前兩個月已經有股票行推4.99蚊佣金，仲有$888月費套餐。對散戶嚟講，經紀頂爛市當然好，但對經紀嚟講，就越嚟越難做。
溫敏妮
http://wanmanli.com/blogs/