楊千嬅正為下月的演唱會忙個不停，節食操弗，瘦到樣子都有幾分像孫燕姿。歌手開個唱，自必會推出演唱會sideproducts，千嬅與本地品牌GroundZero合作推出特別版tee，但收益則撥捐一直任大使的UNICEF，其一班好友許志安、蘇永康、陳小春和王菀之均義務拍宣傳照。
楊千嬅日前在九龍城排舞室為下月演唱會綵排，穿上聯合國兒童基金會（UNICEF）黃色tee的她說：「做咗5、6年大使，屋企有20、30件UNICEFtee，長短袖、乜色都有。探訪嘅體驗同感受，都係一次次咁累積，最開心係呢一兩年去，真係睇到發展中國家嘅設施有改善。」
學懂放低名利
剛去完非洲探訪的千嬅，謂歷來探訪最深刻的一次，是發生在青海，一個三口家庭，父親失明出外打工，母親小兒麻痹，每日用半小時才爬到下床，煮食後也只能用口對口方法，餵養兩歲女兒，看到千嬅心噏，她說：「以前每次探訪，我都好硬頸，見到乜嘢都會護士上身，但呢個個案係最入心，我冇喊，以前我一定會喊，但經歷過之後，令我更加尊重生命。」
身體力行去接觸，改變了千嬅的價值觀和人生觀，懂得感恩、少發脾氣，也學懂放低名利得失，她說：「唔係獎項，更重要係放低自己嘅睇法。以前將自己嘅事業睇得好大，好多artist覺得自己唔應該入世，好自我中心，我入行前做咗4年嘢，好多嘢比其他artist世故，人哋會覺得我世界女，我會介意，我會唔開心，喂，做乜咁講我先，以前我會留意啲娛樂版頭條有冇寫衰我，家就唔會。」
婚後變平常人
千嬅續說：「呢5、6年我會多咗約番啲圈外朋友，搵番啲真實的感覺，畀自己返番生活入面。」過去一年與老公丁子高及奶奶一齊住，也讓千嬅由一個歌手，變得更貼近平常人的生活，她說：「同奶奶一齊住有好處，我乜嘢家頭細務都唔識，成日俾人搵笨，買貴嘢，有奶奶處理就好囉。」
陳奕迅做嘉賓
談到演唱會，這是千嬅第五個個人演唱會，千嬅透露陳奕迅會上台做嘉賓，至於老公丁子高，她說：「大家成日以為佢好恨上台，其實係我好恨有人喺台上唱歌畀我聽。」
採訪：R.AuYeung
攝影：ChanShunChing
GroundZero熊仔成雙成對
今次與楊千嬅合作推出個唱tee的GroundZero，之前推出的仿美元熊仔tee，得到不少女星熱捧，如容祖兒和蔡卓妍等。今次配合千嬅LadiesandGentleman演唱會主題，個唱特別版tee的圖案，由一隻teddybear變成一對男女，女仔熊更穿了高跟鞋，每件售480元，收益撥捐UNICEF，千嬅還找來一班好友如許志安、蘇永康和陳小春等拍攝宣傳照。
