即係續集定前傳呀？簡單講，內容係講第二集之前發生嘅事；打喪屍之餘，仲要搵藥畀就快變喪屍嘅阿囡，吊住佢條命！《DeadRising2》仲要等到月尾先有得玩，但XB360機主就有得下載體驗版，率先進入呢個人比喪屍更喪嘅世界。
文：阿洛
玩落人喪過屍
《DeadRising2》推出在即，XboxLive率先俾玩家Download試玩體驗版。故事是前傳性質，講述尚未推出的第二集男主角ChuckGreene，去到賭博城市「幸運城」三年前嘅事；因為喪屍大規模出現而家破人亡，老婆死咗，阿囡又俾喪屍咬到，咁大家都知俾喪屍咬到就會變喪屍，唯一希望係定時服藥，同時因為政府實行有殺錯無放過政策，男主角避免阿囡俾人殺死，惟有四處流浪。
老夫子都有教咩叫「禍不單行」，兩人逃至StillCreek時，竟發現喪屍解毒藥物被人偷咗，所以遊戲除咗要對付喪屍，仲要提防身邊小人。
養成儲蓄好習慣
作為前摩托車障礙賽冠軍嘅主角ChuckGreene，喺城入面除咗對抗喪屍之餘，仲要不停搵藥物畀阿囡食，同時間，為咗升Level同賺錢，玩家仲要喺城裏面救埋其他生還者。呢集前傳嘅Level同金錢，係可以繼承落去嚟緊嘅第二集，所以早玩唔只早享受，仲可以為自己嘅將來作打算。不過要留意，前傳故事中男主角最高只可以升到Level5，好合理吖！
隨街執武器合成
喺尚未推出嘅第二集遊戲圖片中，見識過ChuckGreene揸住架兩邊裝咗電鋸嘅爬山電單車，喺喪屍群中鋸爆「無雙」，感覺何其壯觀呀！
Download版前傳亦唔弱，首先有騎呢鹿頭俾男主角戴上頭四圍衝、插爆喪屍，仲有就係手推車、棒球棍等一類隨街執起「蠱惑仔」武器；不過最扯風當然係佢個武器合成系統，例如可以將把散彈槍加落把長叉度，變成可以拮停喪屍、叉住嚟射嘅多用途武器。可惜，遊戲入面只容許你用膠帶組合兩種日常生活用品或武器，而且仲要在得到組合卡情況下先可DIY，感覺蠢咗啲囉！
Profile
《DeadRising2：CaseZero》
遊戲開發︰CapcomEntertainment
類型︰動作
遊戲平台︰XB360
遊戲人數︰1人