仲有半個月就係中秋節，都要買番啲月餅應節，有時間逛吓啲商場都有好嘢執，MTR商場老友同小妹報料話，德福商場同青衣城即日起至21日期間，會舉行中秋食品展，推出20幾間參展商展銷最新款嘅月餅，仲有折扣優惠㖭。
優惠價買月餅
老友話，好似專出榴槤月餅嘅醉榴香，今次首創蜜柚月餅，餡料採用日本柚子果肉，含有豐富嘅維他命、有機酸同礦物質，食入口啖啖清香，又有美顏作用；仲送出$20購物優惠券。食月餅食到美顏，幾啱小妹嘅需要喎。老友又話，鴻星推出迷你金莎奶黃月餅，細細個啱晒女士嘴形。和記隆劈價促銷冰爆金箔珍珠月，原價$268，優惠價$98，折扣有成三六折。
老友又話，9月10至12日，同17至23日期間喺MTR商場指定商舖消費滿$300，就有機會抽獎贏取新城演唱會門票或Q版台灣紙箱水果糖。
世貿中心、將軍澳東港城等8間新地商場都唔執輸，同帝苑酒店合作打造雙黃白蓮蓉月餅連大紅袍茶茗錦盒，顧客今個月12日、18日或19日喺商場消費滿$1,500，就獲贈一盒，先到先得。馬鞍山新港城中心由15日起舉行東瀛綵燈慶中秋，將商場佈置成日本東北典型嘅華麗燈影，展出20呎高嘅扇大燈，繪上顏色鮮艷和風圖案，再配上逾300個日式花燈，啱晒小妹影靚靚相。
電郵：mailto:[email protected]