無綫《超級巨聲2》嘅90後參賽者黑暗小公主梁皓婷，一向新聞成籮，除咗因為佢唱《儍女》引發杜麗莎惡魔上身同陳潔靈開火外，亦有指佢係仔王仲幾乎為情自殺；兩個月前佢又俾人影到同巨聲幫嘅李榮耀返歸過夜㖭！近日小公主又獻新猷，被網民以洋洋千字撰文《藝人觀影醜態錄》blog爆佢嘅睇戲惡行。
署名晞嘅網友日前喺網誌聲稱，早前喺apm睇下晝3點9開場嘅謝霆鋒新戲《綫人》時，當時隔籬坐正由男伴陪睇戲嘅梁皓婷，佢一坐低就不停講電話，仲對住電話筒爆粗：「X！我留咗飛畀你啦！睇緊戲呀妖。」喺官方資料報稱偶像係霆鋒嘅黑暗小公主，睇戲時仲公主病發作大吵大鬧，猛嗌點解霆鋒未出場，到霆鋒出場，佢就high到狂撞椅背。
「願意接受批評」
當電影尾段講霆鋒逃亡去茶果嶺村時，小公主竟然問男伴：「茶果嶺喺邊度嚟o架？係咪香港嚟o架？」佢見到霆鋒戲中被打仲疑似落淚，同行男伴終於忍唔住話：「早知係咁唔同你睇啦。」
據晞講在場觀眾都頂唔順小公主，怒睥甚至「殊」佢，但佢一於少理。晞喺散場時見佢同fans風騷影相，先知佢係巨聲幫嘅梁小姐，晞喺文中鬧爆佢：「她本身名氣已經夠差，公眾場合中請尊重一下他人，也尊重一下自己。」又話若畀呢種人紅到，簡直係演藝圈嘅墮落悲歌。
事後有人將呢篇網誌轉載去梁皓婷嘅官方blog，相信佢都知道俾人唱，佢留言話：「我知道網上有很多大部份都是失實的報道；我知道我自己要學的東西還很多……所以我衷心的願意接受各種各樣的批評。」到底誰是誰非，就由大家判斷嘞。