名人霍震霆之子霍啟人涉嫌醉駕被控，由生母朱玲玲（現羅康瑞夫人）陪同上庭，自不然吸引大批記者到場。名人之子為何要醉駕？咁有錢，搭的士有乜唔妥？香港不少名人富豪住在港島，由屋企往返蘭桂坊、蘇豪、灣仔，的士費唔會超過三四百元，而且晚上中環一帶，的士供過於求，搭的士話咁易啫。既然警方頻頻追查醉駕，啲公子哥兒應該知道：如果阿爸唔供應埋司機，要去蒲吧痛飲嘅話，一於坐的士來往啦，無謂累己累人，亦無謂累親名爸名媽在法庭拋頭露面。咁簡單嘅理由都唔明白，父母平時唔通唔識教仔教女？
左丁山飲宴頻繁，已經唔揸車出中環好耐，晚晚坐的士返屋企，感覺良好，有時飲咗一杯紅酒，在的士上瞌一瞌，更加舒服，理得邊度有「卜落」查車吖。一班老友亦守規矩噃，揸車者例牌唔飲，更有放工後揸車回家，再坐過的士出嚟食飯，飲番兩三杯，先至坐的士回家嘅，咁就點會出現醉駕事情吖。名人子女為何不能如此，難道阿爸送架波子、奔跑俾你地，就一定要在晚上向男女朋友演嘢？
呢日出席黃昏酒會，見到不少城中名人，慶幸各名人並無出現過兒子醉駕事件，摸着酒杯底與律師Ｃ講：「如果你位公子醉駕被捕，你會點？」律師Ｃ話：「唔會嘅，我個仔已經做咗律師，一定會守法律，我唔驚佢醉駕，只驚佢買唔到樓啫。」吓？律師Ｃ之子係律師，驚買唔到樓，有冇聽錯？律師Ｃ話：「你冇聽錯，初出道嘅律師點會有錢在市區買萬幾二萬蚊一呎嘅樓呀？我唔會買層樓送畀佢嘅！一定要佢自己供，但諗嚟唸去，佢自己唔知到幾時先至搵夠首期，都怕係要由我出首期五至六成先咯。」醫生Ｐ插嘴話：「我地啲仔女買唔起寶雲道嘅嘞，我個女係初出道醫生，我叫佢去沙田第一城買上車盤。」唔，舊年施政報告之後，特首在電台直播聽市民電話，有聽眾話醫生嫁律師，買唔到半山住宅，特首話香港仲有好多樓盤係四千蚊一呎嘅。眨吓眼又快一年，四千蚊一呎嘅樓好似少晒噃，如再有類似聽眾嘅電話，曾特首點樣回答呢？