波斯王子武鬥全場　聲畫哐哐聲

好多Game都改編成電影，倒番轉又得唔得呢？《波斯王子：超時空之戰》就話行得通，改編自UbiSoft同名大作，動作冒險元素齊晒，即使未玩過遊戲，亦同樣睇得過癮；睇完BD，我更有翻煲隻Game嘅衝動！

記者：許福合

逃命鴛鴦　一拍即合

前身雖然係遊戲，但既然改編成電影，好自然會加入荷李活公式，華麗、熱鬧、動感絕對唔少得；故事背景係神話同傳奇並存嘅遠古時代，主角係身手非凡嘅波斯王子，王子遇上公主塔美娜，聽落好似好老土，不過咁先有古講。
話說波斯王子因被當成弒父疑兇，被全國追緝；而公主又因有逆轉時空嘅時之匕首，而被妖魔追殺。兩個逃命鴛鴦當然一拍即合，齊齊着草之餘，波斯王子仲話要護送公主到守護者聖殿。

CG特技　打鑊金

機迷一定知！波斯王子係UbiSoft老牌名作，原遊戲在PS3上，畫面絕對可用華麗形容，不過我最有印象都仲係動作場面，如今搬上大銀幕，動作場面仍然非常豐富，甚至部份場面，都與遊戲有似曾相識之感；基本上每隔數分鐘就有一場追逐打鬥，當中更包括攻城大場面，以荷李活級特技製作，自然比遊戲CG效果更真實，所以好建議各位睇Blu-ray版，有三大場景必睇，例如波斯王子攻聖城一幕，震撼感十足；與夏山斯族一戰，殺意濃烈又熱血；不過最正都係釋放時之砂時，BD睇特技，刀劍格鬥哐哐聲，音效更炸到飛起。

必睇Bonus：解構兵器庫

講明係荷李活式電影，要睇深度、想食橋扭古仔？絕對唔使期待！不過用嚟消磨時間，片中動作、刺激場面都應該可以滿足晒！但睇完正場，記得睇埋Bonus，可以見到電影內聖城，原來係由350名工作人員建成，亦可以睇到專為電影製作嘅3,500件兵器，好似睇緊DiscoveryChannel咁。