台灣一向係港人旅遊熱點，家仲可以免費上網辦簽證，夠晒方便。不過有人話台灣去過咁多次，仲有乜好玩呀？小妹就向大家推介單車環島遊，即係靠兩隻腳加兩個轆，環繞寶島一個圈！
九天團約5500港元
話說台灣近年流行一股環島熱潮，由開車環島到機車（電單車）環島，演變成單車環島，最近仲開始有人徒步環島㖭。當地人話環島係愛台灣嘅表現，代表熱愛這片土地，單車環島講求毅力又夠環保，好受人尊敬。家香港都有唔少單車好手飛過去台灣環島。
小妹膽粗粗同男友參加咗當地好有名嘅環島團搞手「鐵馬家庭」嘅九天單車環島團，行程包食住連埋租單車等收費大約5,500港元。小妹經佢哋嘅網站（ http://www.bit.org.tw/）報名同滙錢，都幾方便，機票當然要自己訂啦！
小妹提早飛到台北參加環島團茶會，了解吓行程，翌日晨早5點幾出發，全程踩足九日，平均每日踩超過一百公哩路（每日11小時），其間翻山越嶺，行經出名危險嘅蘇花（蘇澳至花蓮段）公路，沿岸景色靚到痹。踩到周身骨痛在所難免，但係絕對係難得體驗。環島期間，車隊沿途好受民眾歡迎，好多人喺旁邊大叫「加油」，啲司機好禮讓車手，有間便利店老闆仲請環島勇士任食思樂冰㖭。有當地人知道小妹係香港人，更加讚到「嘩嘩聲」。
小妹都冇乜踩單車經驗，都可以踩畢全程，一般人能夠一日內踩單車來回大圍至大尾督三次，基本上體力能夠應付環島。沿途大會派車跟尾，萬一炒車受小傷，團友可上車休息。
電郵：mailto:[email protected]