香港人嘅創意真係唔小嘢。理工大學眼科視光學院嘅專家鄧卓仁用咗四、五年時間，研製咗一個叫「海明威——長春」嘅潛水助視器。呢件嘢睇個名仲以為係同寫《老人與海》嘅著名作家海明威有關，但實情係一個潛水用嘅放大鏡兼老花鏡，專畀一啲有老花嘅潛水員喺水底時睇近嘢。
鄧卓仁同八方講，家市面畀老花人用嘅潛水用品，一係就加大潛水鏡空間畀你戴埋個老花眼鏡落水，但會好唔舒服；一係就係個潛水鏡用漸變鏡片，上半部睇遠嘢下半部睇近嘢，但水底視野會收窄。佢呢個發明係一個外置嘅眼鏡，可以扣實個潛水鏡，睇近嘢時拉落嚟，睇遠嘢就拉返上去，家喺市面一啲潛水用品店有得賣，每副連鏡片賣緊千零蚊。