家庭對一個女人來說有幾重要？45歲的息影女星夏文汐，優雅地宣佈復出。80年代的她，作風大膽，由第一部作品《烈火青春》到轟動一時的《唐朝豪放女》，現在她回想起也輕輕笑說：「濕濕碎啫！」在走紅之時，她毅然選擇退出娛樂圈，專心相夫教子。轉眼20年，在家人支持下，夏文汐決心重返影壇，尋找一直未嚐過的影后滋味，但家庭永遠是她的第一位：「我始終係個女人。」 撰文：溫敏芝
夏文汐在82年與葉童、張國榮合演的首部電影《烈火青春》嶄露頭角，戲內一場與湯鎮業在電車內做愛的場面，令人印象難忘。其後，她連串拍了《唐朝豪放女》、《花城》、《朝花夕拾》等電影，80年代末，夏文汐到台灣發展，邂逅商人黃冠博，不久便結婚，移居美國。
在美國住了10年的夏文汐，與黃冠博結婚後育有三位女兒，她日前接受本報記者專訪時說：「20歲嘅大女喺新加坡讀大學，二女都18歲，佢同16歲嘅妹妹喺上海讀美國學校，呢一年幾我住喺上海，已經習慣上海嘅生活環境，可能家美國蕭條緊，唔係咁好住啦！」
在上海，夏文汐重遇不少圈中好友，始發現仍有機會重返影圈，她說：「我喺美國真係冇諗過可以復出再拍戲，好奇怪，人生際遇自己都唔可以肯定，我啲朋友話我可以拍戲喎，我先諗吓。」
「睇人哋攞獎心噏」
夏文汐坦認復出是希望一嚐當影后心願，她說：「我成日都好遺憾，睇見人哋攞獎，個心會噏噏哋，希望有一日可以攞獎，會係幾開心呢，好似惠英紅咁都好。」
息影時，不少電影人找過夏文汐復出，當時她都堅決不拍，始終將家庭放在首位，她說：「三個女太細喇，我都要照顧佢哋，之前張艾嘉搵我拍《想飛》，我都係偷雞返嚟客串，其實我返嚟係睇吓住喺香港嘅媽咪，因為一年先返嚟見一次。」這位新潮媽媽，自言管束三位女兒不算太嚴，她說：「當然三個女都經歷過反叛期，但係大家就好似朋友關係，因為先生要做生意，起居飲食都係我照顧，家個個大晒，我感覺太free喇，不如做吓嘢啦，見人個腦筋先會活躍，人都靚啲，以前會好似老人癡呆。」
復出拍戲，夏文汐也得到家人支持，她說：「先生好支持，因為佢知道我成日一個人喺屋企好悶，我哋通常一個月先見一、兩次，但大家已經係老夫老妻，互相信任，我哋可以上網見，我同啲女都係咁，家科技可以將大家拉近好多。」她坦言結婚初期，與丈夫偶有嗌交時候，但現在大家都成熟，關係像朋友般互相關心，少見面反而更掛念對方，可以回憶以往甜蜜的片段。
飲食清淡跳舞喼弗
夏文汐當年紅極一時，毅然選擇結婚生仔，步入人生另一階段，對此她說：「我從來冇後悔，我選擇係啱嘅，我始終係個女人，冇理由顧住工作，冇理由唔結婚，我鍾意唔同階段，工作、結婚、做媽咪，家回顧自己做嘅嘢，每樣都好唔同。」
生了三位女兒的夏文汐身形依然弗爆，她表示平日在飲食方面較清淡，也保持運動，她說：「喺上海好多club，可以畀我成日跳舞跳兩、三個鐘，當係運動。喺美國嗰陣，啲人着得隨便啲，上海就個個都識裝扮，生活環境都有影響。」
回味大膽情慾戲：濕濕碎
夏文汐84年的代表作《唐朝豪放女》與萬梓良埋身肉搏，激情大膽，回想起她也笑說：「當年都拍得好辛苦，嗰時喺台灣真係好轟動，不過都未興起藝術片。」
在82年處女作《烈火青春》中，夏文汐和湯鎮業在電車上做愛，成為新浪潮電影中最經典的性愛鏡頭。現在回想起會否覺得當年太大膽？夏文汐說：「都OK，我接受到，電影拍唔到咁係唔好睇，唔會有突破，要拍到同角色一模一樣先突破。」現今的o靚模與她當年是否相似？她笑說：「家衣着再大膽啲！嗰個年代先叫大膽，家濕濕碎啫！」
盼與發哥阿B再合作
至今仍有戲癮的夏文汐，已獲兩片斟洽演出，一部是潘源良電影《出軌的女人》，另一齣是邱禮濤的《秋瑾》，她會演秋瑾的金蘭姊妹，她說：「兩部我都有興趣，潘源良當然想我拍，但係我自己嘅問題，心理上做唔好就唔想做。」問她是否擔心與演男妓的陳偉霆拍激情戲？她說：「如果劇情需要，我接受到，家拍kiss戲好平常，但都要自己做得好先拍，做唔好就唔拍，我諗要遲啲先知點安排，時間唔夾就會二選一，我驚兼顧唔到，想專心做好一部。」
夏文汐坦言希望與當年拍檔周潤發和鍾鎮濤（阿B）再結片緣，她說：「阿B可能會喺《出》片做我老公，但暫時未定，我之前先見過阿B，成20年冇見，佢話我冇變過，佢夠係冇變過啦，我仲同佢講笑：『係呀，因為我唔識煮飯，喺美國食即食麪多，食得防腐劑多嘛。』」
化妝：KennyofZingmakeupschool
髮型：KelvinKooofHair
服裝：Anteprima