世界盃後餓咗一排波，9月起歐洲主要聯賽開晒鑼，小妹同好多港人一樣，最鍾意睇英超，貪佢多靚仔球員。睇波就當然要有一大堆嘢食啦，最近行超市，見到有連英女皇都食嘅鮮牛肉賣，無添加劑同荷爾蒙，啱晒注重健康嘅我，加埋手製英式口味薯片，睇英超食埋當地嘢食，簡直係perfectmatch！
人手製英式薯片多口味
噚日去金鐘shopping，喺太古廣場間超市見到有個「英國美食節」，好多款英式嘢食賣，來頭最大就係ScotchPremier嘅新鮮入口牛肉，呢個品牌嘅牛肉來自蘇格蘭大草原，獲英女皇頒佈皇室御用保證，係英國皇室白金漢宮嘅供應商，多數都係60幾蚊100克，價錢唔算太貴，煎一煎佢就食得，配埋靚酒真係無得頂。
薯片亦係睇波必備，美食節入面有用葵花油炸嘅英國人手製薯片，龍蝦、檸檬、芝士味乜都有，13蚊唔使有一包，啱晒我呢啲薯片狂。呢間超市仲引入喺英國嘅乾果朱古力，當中黑朱古力酸櫻桃味同牛奶朱古力芒果味仲得到今年當地GreatTaste大獎，攞晒獎嘅零食點都要試吓，費事俾人話Out啦。牛扒薯片食得多，都要啲健康食品平衡吓。我都入咗啲英國小麥食品、無添加防腐劑果汁，唔係點保持苗條呢！美食節今個月23號就完，我一次過掃咗唔少貨，貨源充足，睇英超之外，睇埋呢兩個星期嘅歐洲國家盃外圍賽都得呀。
電郵：mailto:[email protected]