接替李國能出任終審法院首席法官嘅馬道立，噚日喺禮賓府正式宣誓就職。馬法官喺啱啱由俄羅斯返嚟嘅煲呔監誓下，作出司法誓言，承諾擁護《基本法》，盡忠職守，奉公守法，公正廉潔，為香港服務，並承諾以無懼、無偏、無私、無欺精神，維護法制，主持正義。
54歲嘅馬道立呢個月1號履新，佢話對獲委任做終審法院首席法官感到非常榮幸；又話呢項任命責任重大，一定全力維護法治及司法獨立，以此為使命；仲形容噚日係人生另一個新階段，覺得好開心咁話。
煲呔喺宣誓儀式上大讚馬法官有豐富司法工作經驗，任職高等法院首席法官期間表現卓越，備受各界認同，相信佢勝任有餘。