廣播處長黃華麒被指曾經提議換走《頭條新聞》吳志森同曾志豪之後，盛傳佢除咗即時捉鬼，噚日仲突然喺港台召開講明唔好向外披露嘅內部會議，叫咗差唔多400名港台員工聽佢回應近排嘅《港台約章》同《頭條新聞》事件。
黃處長唔講猶自可，一講就令唔少港台員工即時扯火。據知噚日除咗有港台工會成員炮轟黃華麒違背承諾，不滿佢先斬後奏簽署《港台約章》，唔少員工又不斷追問，究竟佢有冇建議過換走吳志森。
八方聽聞，黃華麒會上一直耍太極，唔肯正面回應有冇講過，佢仲反問員工：「我係處長，唔通批評吓啲節目都唔得呀？」唔少員工認為黃處長呢個所謂解畫會，實際越描越黑。