河水是淡、海水是鹹。時常覺得河海交界的水，味道會很特別。同樣，地理上受到歐亞兩地文化衝擊的土耳其卡帕多基亞，一邊保守、一邊開放，混合出來的文化、生活，究竟是淡還是鹹的？
記者：蕭漢祥 攝影：譚盈傑
鳴謝：土耳其航空、AnatolianBalloons、GRSCorporationLtd
轉轉轉吧!飛碟
土耳其原來也有夜生活。出發前根據資料搜集，有說土耳其旋轉舞並不可視為舞蹈，因為旋轉舞源自伊斯蘭教中的蘇菲教派，舞步就像地球與太陽的關係，藉住旋轉舞步圍繞真神禱告，一舉手一投足均極具意思，莊嚴又神聖。一般，演出者是男性，頭戴上代表墓碑的高帽，穿着代表墳上塵土的黑罩袍，帶領着修行者，面朝麥加方向展開禮拜。講真，齋睇以上資料都覺悶，所以心中抱住觀摩態度，點知出乎意料。
在卡帕多基亞，旋轉舞已成為一大表演，在某些餐廳都有得觀賞。今次去的餐廳，以山洞為主題，一開場舞蹈員就嚇親小記，先以肚皮舞招呼大家。雖不至於好性感，但畀着古時一定會話：「該煨囉，咁少布！」無錯！時代唔同咗，現在的土耳其女性，即使對宗教虔誠，都只會用布包住個頭，唔使遮面或遮蔽全身。然而，當現場見有歐洲男觀眾打賞舞蹈員精采演出時，直接將錢?連?埋?隻?手「攝」入舞蹈員姐姐的上衣內，小記即場O嘴！
到焦點所在的旋轉舞，或者因為市場主導，舞者已變成以女性演出。喺約十分鐘的旋轉舞中，表演者不停逆時針轉動，並揮動手上搖鼓，更打開兩層的長裙，形成飛碟。好看！看完意猶未盡，還有不少人齊齊玩「拉龍旋轉舞」！
a.HarmandaliRestaurant
地址：KavakYoluUzeriUchisar,Nevsehir
費用：每人$490（包晚膳及表演節目）
驚！裏面有個髮福洞
"Ohmylove..."去到卡帕多基亞專賣陶瓷製品的城區，真係忍唔住唱番首土版〈UnchainedMelody〉。呢度製作陶瓷器的工具頗簡陋，靠自己隻腳一下一下咁推，令腳下的轉盤轉動，仲要着住條大褲襠牛仔褲保護雙腿，都咪話唔辛苦。當日剛好有兩位由韓國而來的美少女，想親身試吓製作陶瓷，不過試咗兩下佢隻腳就已經唔協調兼疑似抽筋，搞到「牛郎」師傅忍唔住出手相助，上演土韓版人鬼情未了。陶瓷店內放滿數千件製品之多，在此買陶瓷，比伊斯坦堡平約十分一。
除了瓷器有排你睇，另外，裏面仲有一個「髮福洞」！遊客可以剪下一撮頭髮，連一張個人卡片紙條掛在洞上，負責人話，咁樣係為自己祈福求平安。呢個洞估計至少700呎，掛滿頭髮都咪話唔驚。
b.ChezGalip
地址：50500Avanos
網址： http://www.chez-galip.com
貴!冠軍絲綢地毯
除了牛郎做陶瓷，估唔到仲有織女做地毯。絲綢地毯亦是卡城特產之一，這裏的地毯全人手製作，負責人話織一張普通花紋的地毯，就要花一名女工一年時間。若果面積更大花紋更複雜，就更長時間，所以價值不菲。當中最特別是三張嚴禁拍攝的地毯，曾於07至09年三度參加美國的地毯設計比賽，其中一張更獲得冠軍，現已價值五十幾萬元。咁貴，唔好話踩上去，摸吓都唔捨得！不過呢度最便宜的一幅地毯三千多元起，手織喎，都諗得過嘅。
c.Bazaar54Cappadocia
地址：ZelveYolu,50500Avanos,Nevsehir
網址： http://www.bazaar54.net
嘆!山洞紅酒
卡城原來亦是一個釀酒之鄉，不少土地都用作葡萄種植，幾家酒莊靜靜起革命，要為卡帕多基亞紅酒打出名堂。Turasan雖只得67年歷史，並無百年珍藏，但係因為得天獨厚的地理條件，多山洞，使發酵和儲存過程都特別好。講多無謂，試酒最實際！靚紅酒開瓶之後，要經歷呼吸階段，差嘅紅酒一接觸空氣就變酸，小記試飲一支08年釀製的紅酒，即使開瓶約半小時，但酒味依然濃烈而帶果香。
d.Turasan
地址：CimenliMevkii50400,Urgup,Nevsehir
網址： http://www.turasan.com.tr
無敵監視凳?
土耳其人是虔誠的伊斯蘭教徒，特別是齋戒月，可以不吃不喝，向阿拉真神表達忠誠。因此，當小記第一次看見圖中「工具」時，其V形設計令我以為是信徒用作讀經的書架。後來發現，這原來是一張「無敵監視凳」，當地人最愛坐佢在街上閒聊。坐得舒唔舒服？攝影師哥哥親身試：「Patpat剛好『攝』在V形中間，臀部前後位置有承托力，出奇地舒服！」
