校友會午餐例會，搵追數專家K講私隱資料，從八達通轉移/出售個人資料講起，佢話我地每個人嘅私人資料（姓名、地址、身份證號碼），已放在無數檔案之中，好容易被第三者洩漏。嗱，買樓，買車，睇樓嘅睇樓紙，交稅，開手機戶口，上女傭代理公司請菲傭，申請信用卡，買保險等等等，度度都要填上姓名及身份證號碼及其他資料，甚至去甲級商廈開會，未入之前都要抄低姓名及身份證號碼，如果有洩漏出外嘅話，都唔知關邊個事。追數K又講，我地用手機、電腦，等於打開半邊大門，任人偷睇。有心人（特別係公共機關）如要偷聽，易過借火，有人以為換SIM卡，隨時換電話就可避過，係呃鬼嘅啫，根本無所遁形。
電子世界下，無人有私隱可言，已經過咗一九八四咯，大阿哥日日吼實我地，有乜稀奇？吼唔到呀，咪霸王硬上弓囉，睇印度強制RIM嘅黑莓就係最佳例子。
此日有兩位大狀出席午餐例會，大狀T博士新近加盟「清洪資深大律師事務所」，帶埋將於十月加入嘅大狀L嚟見吓啲校友，大狀L呢位刑事檢控專家離開政府後，放完假就會私人執業，與清洪及T博士等拍檔，陣容幾強勁噃。大狀L在大學讀哲學，T博士讀社會學，估唔到今日皆成為大律師，讀書時真係諗唔到。
見到兩位大狀，記起前一晚吃晚飯，席間有一位專打刑事案嘅律師H，本來讀心理學出身，後來唔抵得律師收入高過佢好多，於是重入大學讀法律，家成為刑事案專家，我地於是問佢關於Amina件案，是否厚待名人子姪？律師H話：「據我多年上庭經驗，香港法官非常公正，十分獨立，辯護律師如無好好法理根據，幾難打得甩，不過呢件案家要去到上訴庭，無謂多講。但法制是否公平呢，見仁見智咯。」在所有民主自由國家/地方打官司，通常係有錢人覺得法制幾公平嘅，因為有錢就可以請得郁最好嘅大狀，令到政府檢察官感到頭痛，為咗唔想輸掉官司，檢察官就會傾向捨難取易，以較容易入罪，刑罰較輕嘅條例嚟控訴被告。在美國更可以由被告律師與檢控官傾妥控罪先至上庭㖭。