張愛玲英文自傳體小說上集《TheFallofThePagoda》（雷峰塔）4月面世，隔咗近半年，下集《TheBookofChange》（易經）噚日終於出版。皇冠出版社9月17日仲會同步推出《雷峰塔》同《易經》中文繙譯版，滿足一眾張迷。
《易經》寫於1957至1963年，故事由虛構情節以及張愛玲喺港大讀書嘅經歷交織而成，自傳色彩甚濃。張愛玲遺產執行人宋以朗話，如無意外，《易經》係張愛玲最後一部小說作品，「可以出嘅已經出晒」。
《易經》描述大學生活
宋以朗同八方講，張愛玲筆下人物好多時比較「神話化」，但《易經》就「由一個香港普通大學生眼光出發」，寫吓佢當年喺香港淪陷時期嘅大學生活。
為紀念張愛玲90冥壽同逝世15周年，港大新聞及傳媒研究中心將於9月17至19日，喺中環葵里畫廊舉行「發現張愛玲」展覽，到時《異鄉記》、《張愛玲私語錄》等多本作品嘅原稿都會展出，張迷不容錯過。