甲蟲、mini大把人翻新改造，但連八十年代大發Van仔，估唔到都有狂迷翻身改裝。四萬幾蚊改料錢唔算多，全程自己動手搞先難能可貴。車主坦承噴橙色只為搶眼，最Enjoy停燈位時收視率仲高過拉利，那份滿足感就好似咬落個新奇士橙咁，又甜又多汁。
記者：徐影龍
攝影：陳陶鈞
Model：Vanessa
師奶阿叔
模特兒一見到橙Van時，即時驚呼話好得意，舉起iPhone玩合照。四四方方細細架已夠搶眼，仲要噴埋全車鮮橙色，出街真係好難唔望佢。專登泊在元朗人多車多的勝記牛丸出面，唔使10秒，全個小巴站等車的人望到實，師奶阿叔過馬路時，九成會架橙Van，雖然唔覺有靚女，不過殺落旺角或銅記，相信引死女。
車主阿東有氣沒氣話：「查實呢架大發Hijet唔係Van仔，有棍波私家車牌就揸得。」Hijet？咁似NSX專門店邦哥舖名？「就係因為我哋都咁愛架Hijet，索性連舖名都跟埋。」後生仔可能覺得大發Hijet好冷門，其實於八十年代都Hit過一輪，今時今日想搵番架都幾高難度，「架車好罕有，喺全港行得走得嘅唔會超過5架，我搵咗兩年，先執到架唔算甩皮甩骨嘅番嚟！」
路中搶收視
1.欄杆上兩印巴人士各半粒鐘，就連阿叔過緊馬路，都忍唔住再三回頭偷望呀！
2.小巴從後面駛上嚟，車上乘客已側晒右邊望橙Van，見到靚女Model，連司機都望埋過來。
3.孭袋哥哥最老實不客氣，企遠少少扮講電話，人同車都畀佢喪一輪。
堅持原裝不要豪華
搵車搵咗兩年都算有耐心，返嚟仲要花成四萬幾蚊執靚佢，更癲嘅係差不多全部自己落手落腳搞掂，「除燒焊外，全部都係自己整，包括噴油、車底防銹、頭尾泵把改裝、換晒萎縮膠邊、搭線加裝車尾Hi-Fi等。最辛苦係中排座椅，想跟番日本豪華版嚟改，不過唔啱位，要從頭慢慢鑽番晒啲螺絲出嚟，前前後後搞咗四個幾月，一得閒就執，經常由朝執到晚，又熱又焗，少啲愛心都唔掂。其實仲有好多位可以執得更豪華，例如加碳纖、改波波天花頂等，不過就無晒Hijet味，要靚要豪我不如買新車，使乜咁辛苦。」辛苦係值得，起碼對比甲蟲同mini，令人覺得更有新鮮感。
98年DaihatsuHijet
引擎：660cc
傳動：五速棍波
二手價：約$15,000
零件花費：約$45,000