小時候，卡通人物時常揸住個氣球就可以飛天，自由自在於天空中遊覽。長大後，一直未有機會實現呢個夢想。估唔到今次喺土耳其有奇石林之稱的卡帕多基亞，不但實現了飛天，還遁了地。
記者：蕭漢祥
攝影：譚盈傑
鳴謝：土耳其航空、AnatolianBalloons、GRSCorporationLtd
飛天500米一籮20人
對土耳其的認識，名城伊斯坦堡之外至多是首都安卡拉。其實，距離伊斯坦堡約兩小時機程的卡帕多基亞（Cappadocia），雖是個純樸小城，卻以奇石林聞名，熱氣球觀光更是一大賣點。
要體驗熱氣球之旅，首要克服的是早起身！因為集合時間是晨早五點半！但我擔心的不是怕唔知醒。話說出發前小記睇咗一位朋友的旅遊節目，她乘坐熱氣球遊覽之後，領航員最後錯誤降落於水稻田中，下半身濕晒，相機報銷！因此今次未出發先驚一半。
每個熱氣球約可乘載20人，現場所見，約有近三十隻熱氣球搶住起飛，場面壯觀，雖然互相以無線電通訊，不至於波撞波，但都好貼近。最驚的情節，卻在升空一刻。卡城滿佈奇石，升空時多次與一大座石柱擦身而過，嗰一刻我真係想起《鐵達尼號》撞冰山一幕，有幾近？大家真係要上網睇睇片。其實領航員的技術一流，熱氣球飛得非常穩定。由於當地建築物和山都不高，升至二三百米高時，已可飽覽全市和奇石林景，一小時之旅，熱氣球最高會升至500米，望下去，都有少少腳軟。臨近降落，見有部份熱氣球在大宅和泳池上空掠過……放心，刺激但好安全的！
升空123
a.AnatolianBalloons 一小時熱氣球之旅費用：每人約$1,945
地址：34AdnanMenderesCad,Goreme,Nevsehir
網址： http://www.anatolianballoons.com.tr
蘋果教堂肥啲捐唔入
翻查資料，發現早於公元前六世紀，當時波斯帝國不同國家不同語言中，均有記載卡帕多基亞的名字，證明這裏歷史悠久。好！歷史課係咁多，係時候觸摸吓歷史文物。
市內有座GoremeOpenAirMuseum，於1985年列入世界文化遺產。內裏記載當時卡帕多基亞人的生活和宗教發展，當我以為呢度較少清真寺、教堂時，哼！我又錯了，其實早在熱氣球觀光時，睇到地面一個窿兩個窿的，就係當地人的山洞建築，當然清真寺和教堂都唔例外。這博物館就如一個小社區，有住宿的山洞、廚房甚至公園，最值得參觀的，例如黑教堂、蘋果教堂等，內裏保存了很多具歷史價值的基督教壁畫。部份古蹟潛藏山中，入口又窄，真係肥啲都入唔到！
b.GoremeOpenAirMuseum
入場費：每人約$77
地址：Goreme市中心步行1.5公里
遁入地下城靠腰力
卡城有一個Derinkuyu地下城，約於公元十世紀建成，1969年正式開放，1985年列入世界歷史文化遺產。建議行動不便者咪冒險，因為地下城共9層、深85米，其中7層供遊客參觀，最低兩層有湖和河道，太危險了不開放。除了深，通道狹窄而矮，由第1層向下走，通道由約5呎高慢慢下降，去到第7層只有3呎多。以小記為例，5呎8身高於最後幾層，差不多上落全程蹲下步行，腰力腳力好重要，好彩我夠精壯，哈哈！
但為咩好好的有地面唔住，要入地底呢？因為當時基督徒為咗避難，開鑿地下城，據講最多曾有5萬人居住！入面除了房間、水井，仲有牲畜馬槽等，住幾個月都無問題。唔止咁，萬一被敵人攻陷，除咗有巨石可將通道逐一封閉，方便走佬，其實Derinkuyu還可以通往於20公里外的另一個地下城Kaymakli。齋睇入口，真係估佢唔到，難怪美國咁耐都捉唔到拉登。
c.Derinkuyu地下城
地址：Nevsehir南面約29公里
收費：每人$294，包來回Goreme車費、入場費及導遊
TravelMemo
持特區護照免簽證，BNO須簽證。土耳其領事館：25721331
土耳其航空由香港往伊斯坦堡，轉飛Kayseri機場，來回機票$6,990起。查詢： http://www.thy.com.hk
1土耳其新里拉約兌5.14港元（文中已折算港元）
240V，兩圓腳插座