陽剛味十足的張兆輝，從影以來多參演警匪動作片，他早前獲許鞍華欽點拍同志味濃的電影《得閒炒飯》，獻出很多第一次。張兆輝直言看完劇本有點驚，更曾經為要念露骨對白而難以入眠，不過開工後令他體驗不同的生活方式，反而感覺很寫意。
張兆輝日前在銅鑼灣接受訪問，談及近日在港上映的電影《得閒炒飯》，當他說起與導演許鞍華首度合作，他表現雀躍說：「真係要多謝阿Ann（許鞍華），我哋初初約出嚟睇劇本，佢對住我笑笑口話：『係你喇、係你喇！』佢仲話最初大家度橋嗰陣，傾到呢個角色，第一時間已經諗到我，原來佢哋覺得我好好笑，好啱做呢個角色。」
「對白都幾露骨」
張兆輝續說：「我初初睇劇本嗰陣真係有啲驚，有幾晚仲瞓得唔好，成晚喺度諗點樣做先可以做好個角色，雖然睇落劇本係好平淡，但事實上啲對白都幾大膽同露骨，絕對係收埋喺屋裏面，又或者係兩公婆先會講嘅嘢，不過你睇落唔會覺得好意淫，好反映時下現代嘅生活模式。」
體驗IT人生活
提到這個角色，張兆輝笑說：「我一路都未做過呢啲角色，做嘅嘢同平時唔同，今次我係演一個時下好典型發錢寒嘅香港人，因為有單離婚官司喺身，於是搵咗隔籬office演律師嘅吳君如幫手，跟住好多嘢順理成章咁發生，我哋走埋一齊，但係又形容唔到畀你聽，可以話有嘢，又可以話冇嘅，但係又唔會令到你唔舒服，反而仲得啖笑。」
張兆輝更笑稱拍完這部戲有新體驗：「我哋平時好少接觸到啲I.T.人，人哋收工仲會約埋坐低飲嘢傾吓偈，但我哋收工就嗱嗱聲走，所以今次體驗到另一種生活方式。」
採訪：何慧斯 攝影：林德雄
場地提供：TerminiTeaYard