季初要識得忍功
國際賽期適逢嚟緊周日馬季開鑼，不少賭友相信會將視線轉移至馬場，信睇過先買、信賽績嘅人，都會知道季初無論馬同波一樣會咁難賭。德甲列強開閘輸到甩轆，意甲國米西甲皇馬，首戰玩大家最憎賭嘅0:0，你場場賭，真係有幾副身家都唔掂；馬亦如是，小弟寫過多年馬經專欄，也從未離開過馬場，但心態大變，到現在只在賽日有假放，先專注留意幾個大馬房嘅出擊部署下注；最重要等好友T同F兩位馬友抽空，同小弟聚聚傾吓馬經，就最過癮。
曼聯贏3粒頂10鋪
唔知點解呢排曼聯嘅波同我好有緣，前周極符碌中到和富咸2:2波膽；經過上次，明知費Sir今鋪唔可以再衰，更眼紅爭標對手輪流炒6粒，終於借周六尾場全球直播迎戰韋斯咸發圍。賽前已好有信心捧佢哋[-2]兼貼3:0波膽。但要狠下一注，點都要出埋陣容確認；結果阿Sir出動兩隻老馬傑斯同史高斯擔正，對住新帥格蘭未執掂嘅韋斯咸，剛剛好贏3粒，呢鋪真係一鋪頂十鋪！同日阿仙奴贏2:1，當然冇3:1咁完美，但大家試想，計亞洲盤作客讓到半一，有幾時俾你食到應，贏就半格，輸就十足，所以對隊波幾鍾愛都好，都要忍手；但呢期，我冇說話講，一心兩意：愛阿仙奴，更愛曼聯！
不要只怪泰維斯
波馬股皆好，但係時間金錢有限，所以務必謹慎出擊，求一擊即中；曼聯食到飽，翌日重心保頓也是例飛，上半場已踢少個追到2:2，輸半格算執身彩；但上周講過，捧保頓都唔要作客冇賠率嘅超級大名牌曼城，結果真係批得佢死。若你是堅持重插曼城客W嘅一員，應虛心思考問題出喺邊度，唔好姓賴上身，只怪泰維斯三打一對住空門打飛機！
轉會市場的啟示
看到轉會窗前嘅大刁，估唔到係意甲紅黑兵最勇進，一口氣簽下兩件大跌價嘅當打前鋒伊巴同羅賓奴；英超就靜晒，熱刺知道踢得入歐聯首圈，先至出手，加拿斯同雲達華治都應該啱用，但係踢走瑞士年青人之後竟然主場輸俾大魚腩韋根，咁快歐聯病發？今屆班波喺聯賽走勢，我認為會好反覆，小心。雲格繼續慳家，臨尾得吹水兩字，埋單今季簽咗3件同佢老人家身形都係高瘦、同出身法甲既新兵，能否一搔5季之癢捧吓盃，哥斯尼同史基拿斯兩件法兵要硬淨啲咯。
熱捧法國冷敲比利時
國際賽從來唔係我杯茶，今起放幾天假期休息吓，一心兩意，同好朋友走遠啲食餐好；賀吓老竇牛一，祝佢老人家身體健康。今周〈開倉〉版提早登場就「歐國外」，小弟奉行長期小注，等候出擊訊號嘅攻略，今周信心談不上，可留意法國迎白俄，只望白蘭斯撥亂反正，來個翻身捧[-1]；冷敲比利時迎德國保不敗甚至客W，比軍軍容不差（詳見戰友吾中推介），德國太名牌，戰將似未從世盃興奮平復過來，歐國外長路漫漫，脫腳又如何？
語錄：歐國外開打，長路漫漫，逢列強季初戰力未足，冷門客尋寶良機；不然賭吓馬，或留彈藥在下周英超出擊仲好。