拍過《鎗王》、《異度空間》的導演羅志良，一向處理懸疑弔詭的電影有一手。這趟夥拍余文樂及張雨綺，改編內地小說《荒村公寓》拍成同名電影。對於過往拍過羅導演電影的演員都很難抽離角色，更惹來撞邪疑雲。樂仔笑言拍攝時處身冰天雪地，怕凍多過怕鬼，所以沒有時間想太多。
電影《荒村公寓》現正上映，余文樂表示接拍此片全因導演羅志良，導演的每一部作品他都欣賞過，樂仔非常鍾情導演對氣氛的營造，他說︰「睇過《異度空間》一直好鍾意導演嘅拍攝手法，第一次合作，好有新鮮感，感覺好好玩。」
張雨綺跳井冇怨言
張國榮曾經兩度跟羅志良合作，有傳他因為太入戲不能抽離，一度引來撞邪傳聞，問樂仔可有因而害怕？他笑說︰「套戲喺北京一個山頭拍，荒山野嶺拍咗個幾月，天氣凍到我着兩條虧佬褲都仲係凍，天氣凍到個飯盒可以攞筷子叉落去成嚿飯拎起，我就怕凍多過怕鬼。」
反而嬌滴滴的張雨綺比樂仔還捱得，令他刮目相看，樂仔說：「佢真係好專業，記得有場戲佢要跳落水井，啲水浸到心口位，我伸手試吓啲井水，真係凍到入心入肺，佢可以一句都冇呻，跳落去仲一次過搞掂。」
小說內地掀起話題
另外，羅志良在香港已經拍了20年電影，首趟在北方拍戲，感覺很冷很冷，不過那自然光線及藍天，是香港所沒有的，所以他覺得捱冷也值得，羅志良說：「我一直都好想拍一部有中國特色嘅懸疑故事，呢部小說推出當時喺內地引起話題，令我好奇去睇原著之後就改編咗。」
採訪：何永寧 攝影：陳順禎