效力曼聯嘅英格蘭前鋒朗尼喺英超開齋之後，信心返番晒嚟，日前仲喺國家隊練習時蝦阿仙奴嘅o靚仔龍門舒亞。英格蘭家陣傷兵滿營，中後場冇咗幾件主力，嚟緊聽日對保加利亞場歐國外，睇嚟領隊卡比路都要靠佢食糊。
門將荒召舒亞陪練
24歲嘅朗尼喺上季季尾傷癒復出後，遲遲都操唔起個狀態，搞到喺南非世盃決賽周冇表現，而個頹勢仲延續至今季，跨季連續13場比賽冇波入。於是乎早前有傳，領隊卡比路打算喺今輪嘅歐國外，將朗尼貶做後備。但長路有盡時，朗尼喺上個禮拜六對韋斯咸場英超射入12碼，而喺開齋之後乜嘢信心都返晒嚟，日前仲喺國家隊嘅分隊練習賽，喺18碼笠死以後補身份入隊嘅阿仙奴第5號龍門舒亞。
相信好多球迷同我求大俠一樣，都會問點解會有個阿仙奴o靚仔同英格蘭班大國腳一齊備戰歐國外。查實係英軍2、3號龍門賓科士打同埋卡臣都有傷，卡比路以防萬一，就叫只有19歲嘅舒亞入隊候命。舒亞嘅師兄禾確特就話：「雖則佢俾朗尼笠死，不過應該好享受可以參加大國腳嘅練習。」
高治背傷難鬥保國
英格蘭原本冇咗要養傷嘅里奧費迪南，泰利同林柏特亦因喺上個禮拜六嘅英超整傷而冇入選。而現有球員中，除咗賓科士打同埋卡臣之外，菲臘積基爾卡同埋高治亦受傷患問題困擾，後者仲肯定因背傷打唔到，所以有老婆高蓮拍網上購物網站廣告執咗450萬鎊嘅朗尼，及時回復狀態，對卡比路相當重要。
話時話，英格蘭真係幾黑仔，唔淨止大國腳多傷兵，連小國腳都遇到呢個問題。聽日佢哋會喺U21歐國外作客葡萄牙，但賽前就有隊長魯迪維爾、當「弗」射手安祖卡路爾同埋中場蘭斯貝利，同步前鋒域陀摩西斯嘅後麈因傷退隊，至於門將史密夫斯亦有傷在身，所以我求大俠都替佢哋領隊皮亞斯擔心。