中環在線:股神來華勸捐 潘石屹兩公婆獲邀 - 李華華

中環在線:股神來華勸捐 潘石屹兩公婆獲邀 - 李華華

啱啱慶祝完80大壽嘅股神畢菲特,為咗慈善大業,會喺今個月29號親身飛嚟中國,希望說服一班中國富豪慷慨解囊。股神募捐名單仲未曝光,不過能夠俾股神勸捐,簡直係有「飛士」。如果華華有份,都唔介意周圍晒一晒!好似SOHO中國(410)揸fit人潘石屹兩公婆(圖)咁,已經按奈不住喺微博爆料,話自己獲邀同股神一齊探討慈善問題。
潘太張欣話,美國嘅慈善事業好成熟,而蓋茨做嘅嘢就更上一層樓,中國人應好好學習,幾分鐘後,潘生回應潘太話,蓋茨同畢菲特都為全世界嘅企業樹立好榜樣。佢兩公婆一唱一和,即時成為微博熱話,有網友甚至單刀直入問佢哋會捐幾多錢。
李華華