內地即將迎接中秋加國慶即「金九銀十」之傳統消費旺季，市場本來一心以為中央經過對樓市持續近半年打壓後，臨近大時大節點都會鬆鬆綁，誰知近期樓市訊息變得更加混亂，有說因為調控咗足足3個多月嘅樓市突然回暖，導致金九銀十期間調控加碼。然而整個8月北京二手房銷售每周均呈現上升，由首周2246套升至第二周2629套，進入第三、四周更上升至3000套及3296套，平均每周升幅達1成，而且係量價齊升。
真正有心買樓人士眼見內地各相關部委甚至銀監會等極都唔肯鬆一鬆，意興闌珊之餘更有點按捺不住，最後豁出去。
潘石屹兩度唱淡內房
一個星期內兩度唱淡內地樓市嘅潘石屹潘總，前天在其博客中以《對住房價格的看法不能脫離常識》為題，他認為內地資金雖欠投資渠道及市場看好資產升值等因素，但內地城市住房租金回報只有1厘，投資不能只看升值而不睇回報率。可是個人認為假如真係睇得咁準資產短至中線肯定升值，租金回報率隨時微不足道。
潘總看8月份城市成交量回升，未必是樓價會升之先兆，反而因為下半年供應增加、持續政策調控及保障性住房推出，更凸顯開發商內部資金緊張。
樓市真正的力量來自市場，即係來自供求關係，保障性住房佔土地供應不能少於50%及當年開工面積不少於50%，似乎只是另一個美麗嘅政策藍圖。中央4萬億救市計劃及央企搶地王才是推高房價之兩大因素，再者，就算無人願意承認也不能不認去年銀行寬鬆貨幣政策已覆水難收，錢流去哪裏已有點不清不楚。總括而言，潘總睇09年初水平嘅房價才是正常嘅房價水平。投資者正擔心近期嘅回暖現象再一次係開發商製造出來嘅假性回暖，時間會證明一切，走着瞧吧！
胡孟青
作者為獨立股評人