新民主女神像（圖）同天安門屠殺浮雕入中大就快三個月，已經成為當地其中一個地標，據聞好多訪客都鍾意喺嗰度影相，又有參加夏令營嘅中學生喺嗰度宣誓。學生會之前講過會由學生公投決定女神去留，新任校長沈祖堯噚日出席公開場合嘅時候，話希望盡快同學生見面，希望學生喺會面之前唔好搞公投咁話。
沈校長一直予人開明形象，比上手有觀眾緣好多，今次咁講算唔算出口術壓公投？記憶所及，學生會過去幾個月，出過唔知幾多次聲明話想同校方會面，只是校方一直冇回音，會長黎恩灝話，之前同沈校長見面提到呢件事，對方都係話「再約，再約」，冇講實日子，亦從來冇正式邀請同學對話。佢仲話公投幾時搞、點搞，係學生自己內部嘅事，多謝校長關心。