五區公投過咗，區議會選舉仲有成年先舉行，南區補選係兩男之爭，近來網上流傳一份八大版藍藍綠綠校園feel嘅神秘政綱，三個候選人一個sell烱烱眼神、一個（聲稱）sell靚仔、一個sell粗框眼鏡（！？），話要參選藝發局範疇代表選舉，咦？乜藝發局有選舉o架咩？「範疇代表」係乜東東？三個人噚日仲浩浩蕩蕩殺上藝發局度大派1,000蚊紙，到底所為何事？
指選舉黑箱作業
八方孤陋寡聞，上網搵一搵先發現原來藝發局27個委員入面有10個係民選，分別屬於藝術行政、藝術評論、藝術教育、戲曲、舞蹈等10個界別，一直以嚟投票率都唔高，唔少人自動當選；選民分成團體同個人，個人要經審核，證明係藝術家，團體選民相對易做，只要所屬團體登記咗，所有會員自動有權投票，簡而言之，即係藝術界圍威喂選舉，一般小市民冇得玩。
三個青年藝術家：文學雜誌《字花》編輯鄧小樺、反高鐵時期負責寫橫額嘅葉浩麟Roland同埋保衞過天星嘅蔡芷筠ger，就係睇唔過眼呢種黑箱作業，決定挺身而出組成雞蛋聯盟「八十後文藝青年」，出選三個界別，硬撼高牆。
鄧小樺話，對藝發局委員多大部份係官方欽點，民選委員當選都只係為自己個界別圖利，選咗出嚟仲要等特首委任，八方聽到嚇咗一跳，咁咪同神憎鬼厭嘅立法會功能組別冇分別？
文藝青年反派錢
小樺仲話，藝發局應該幫藝術家發聲，可惜近年藝發局自甘墮落做「分餅仔」機構，所以佢哋先會彩色影印一大叠1,000蚊紙，入落個紅信封度殺上藝發局「反派錢」，希望佢哋知道派錢唔係大晒。
藝發局每年營運資金1.2億元，少過西九三個諮詢方正，官方今個禮拜六會舉行選舉論壇，80後參選勝算好微，鄧某就話：「唔打就唔會輸，打就一定要贏！」八方祝佢哋好運。選舉詳情見 http://www.voteforhkadc2010.hk/tc/index.php
mailto:[email protected]