提起魔術，除了大衞高柏飛，印象中還有生鬼又風趣的Henry哥哥。香港人從來不以賣藝而感到驕傲，也從來沒有人再對廿年前的魔術玩意有任何期望，直至80後魔術師甄澤權揚威海外凱旋而歸，又再勾起大家對奧妙魔術的讚嘆。
記者：葉雪芯
攝影：伍慶泉
甄澤權（Louis）
80後，浸會大學副學士，澳洲伍龍崗大學學士，曾獲多個國際魔術大賽冠軍，打算投資兩年做全職魔術師。
大學生做全職魔術師
中國家長式思維：學一門手藝，一定不會餓死沒飯吃，但有選擇的話，還是最好讀得成書，考個一官半職，從此安穩過活。香港浸會大學市場學系副學士學位、澳洲伍龍崗（Wollongong）大學市場及傳訊學系學位畢業，27歲的甄澤權（Louis），偏偏迷上了魔術這種戲子玩意，更一發不可收拾。就算平時一向唔鍾意英文，都特別去買外國魔術教學書籍和DVD煲住邊睇邊玩，「讀大學時已經好鍾意玩，參加咗大學嘅魔術學會後覺得更加有興趣，學識幾招就成日拉住同學仔要表演畀佢哋睇，直至家已經玩咗七、八年。」魔術作為興趣，實在是無傷大雅，娛人又娛己。可惜在香港生為80後，殊不容易。Louis畢業後找過工作，無奈卻加入失業大軍，「搵咗兩份工，都無人請，自己又咁鍾意魔術，不如做全職魔術師，於是開始喺屋企日練夜練。之後主動聯絡學校同商業機構，爭取表演機會，又開咗一個網頁做宣傳聯絡，慢慢開始建立到一啲network。開初好辛苦，俾人潑過好多冷水，收入唔穩定，於是我定咗個deadline畀自己，玩兩年時間，如果唔得就轉行搵工。」
外國攞獎賺名氣
扣除道具和日常開支，Louis平時所賺取的收入全部都用以出國外比賽用。今年四月至八月，Louis一口氣拿下三個魔術界的大獎項，包括台灣2010全國魔術大會魔術大賽亞軍、第六屆匈牙利JokerMagic國際魔術大獎賽冠軍，是香港唯一獲得歐洲魔術大賽的魔術師；還有第七十三屆美國AbbottMagic國際公開魔術大賽冠軍，亦是首位得獎港人。這些通通都證明及肯定了自己這幾年來的努力，「最開心是攞到AbbottMagic個獎，我偶像大衞高柏飛都喺呢個比賽得過獎，我自己第一次去美國就有獎拎，估唔到。其實香港人玩魔術水準不算低，只係無呢個空間俾佢哋發展，所以好嘅魔術一路都無外人睇到。」揚威海外，一時間名氣鋪天蓋地而來，現時Louis多數接受商業機構、學校、商場等表演工作，年尾旺季有時可達六至七位數，相比初期已好多了。
觀眾看厭製造驚喜
不講不知，原來魔術都有潮流。Louis說，近年魔術師都很少流行玩道具式表演，「以往我哋成日睇到好多魔術道具，例如刀鋸美人，只要個魔術師一推個箱出來，觀眾都估到幾分，已經無咗Surprise；拎頂帽出來，大家又可能估到你要變朵花，其實唔係魔術師玩厭呢種魔術，而係觀眾睇悶咗。魔術最緊要係創意，要畀人耳目一新感覺。」他說，現時他愛用生活化的道具來做表演，「通常我會用好平凡的物品做道具，例如用手機、水樽、卡紙等等，現場叫觀眾提供，一來觀眾唔會諗到呢啲時常在身邊嘅物品原來都可以變成魔術道具，會有驚喜；二來又可以台上台下有互動，開心好多。」
YouTube踢爆真倒米
主要賣魔術道具、用品的Somagic，店主阿成都是魔術迷兼業餘魔術師，人人以為他是愛魔術後開舖，原來正正相反，「開舖前完全唔知魔術係點玩，興趣都係一般，但始終係工作需要，後來喺舖頭日日玩吓，發覺幾得意，而且玩魔術好易同人溝通，之後就放多咗心機去練。」他最愛玩啤牌，閒時看舖總是牌不離手。開店十年，他說近兩年玩魔術的氣氛和環境都變差了很多，「以前比較多人玩，都有好多後生仔買道具返去練，甚至會有人開班教魔術，家就變咗買DVD返去睇住學。因為家太多娛樂喇，打機上網，大家都唔會留意到魔術呢個玩意，更加唔會有咁好心機、放咁多時間去練習；YouTube經常都會有好多魔術大踢爆嘅片，好多人睇完之後都對魔術無咗神秘感。」
阿成說，魔術界早兩年前曾經有過小陽春，除了劉德華、周杰倫等明星愛玩魔術引起過一陣潮流外，還有台灣著名魔術家劉謙的當紅期，「劉謙早兩年經常有上台灣、大陸電視綜藝節目，表演唔同魔術，令當時魔術道具好好賣，只要係佢玩過、示範過嗰類道具產品，第二日即刻賣斷市。可惜近年佢開始少做節目，又無乜出來表演，大家又好似冷淡咗，甚至部份貨品更加滯銷。」
Louis
參加匈牙利JokerMagic國際魔術大獎賽，以變白鴿贏得冠軍。「喺香港有熟習嘅白鴿，但帶唔到出境，惟有在當地借喺酒店用幾日時間密集式訓練佢哋。」
熱賣道具
啤牌是魔術師最常用的道具，美國啤牌Bicycle是必買牌子，因為牌質好，魔術師手感會較好。$43
Somagic（97158209）
旺角山東街47-51號星際城市三樓315號鋪
營業時間：2:00pm-9:00pm
