加拿大電視台報道菲律賓慘劇時，錯指特首曾蔭權係旅行社老闆，近日再有另一高官被點錯相，就係運輸及房屋局局長鄭汝樺，竟然變成做傳銷生意女強人。
最新一期時事雜誌《Newsweek》以中國女性在商界地位，能撐起半邊天為主題進行專題報道，當中訪問咗傳銷公司安利中國執行副總裁鄭李錦芬，主要講鄭女士喺中國做生意經驗，報道四平八穩，問題出在一張相片上，雜誌竟然用咗鄭汝樺嘅相片，搞出呢個馮京作馬凉嘅錯誤。八方相信係因為鄭汝樺同鄭太英文名都叫做Eva，英文名同名同姓，不排除雜誌因此擺烏龍。
邱誠武肯出嚟見人
鄭汝樺噚日開始訪問倫敦及布魯塞爾三日，考察高鐵同長者屋建設，呢次係官式訪問，應該唔會俾人點錯相。鄭汝樺離港，佢位副局長邱誠武留守，早前邱誠武俾政黨投訴擺官威唔肯落區，又唔肯見菜園村民，更俾民主黨杯葛，暫停同邱誠武接觸。八方聽聞經局長斡旋後，雙方關係有望解凍，邱誠武呢個月11日會出席民主黨房策論壇，同場有行會成員張炳良及其他學者。