香港警員到馬尼拉調查槍殺慘案，警員噚日到中國駐菲律賓大使館位於市中心嘅領事部，領回旅行團成員物品，八方同事隨行，可惜不能內進。
據同事講，領事部所在嘅商廈外貌簡陋，唔係跟住地址搵到上門，都好難想像領事部咁隱蔽，只係喺大廈大堂有個水牌，上到去竟然連正式門牌都冇，領事部門外貼咗兩張預防登革熱海報，走廊天花板漏水剝落，唯一有少少氣勢嘅，係一道灰色大門。
呢道門遠睇以為係防彈鋼門，點知上前敲一敲，原來係一道木門。記者等候期間，領事部有個阿叔走出嚟吹水，阿叔自稱在美國讀新聞，話教授講過，報道最緊要準確，媽叉香港傳媒，指港媒報道菲警唔畀港警上旅遊巴調查唔係咁好，事關經過努力，最終解決咗問題。
八方都係讀新聞出身，都記得有教授講過，報道準確accurate係最基本要求，記者更重要係追求真相reality呀！