楊千嬅噚日喺九龍城，為10月紅館開嘅演唱會排舞，千嬅着住背心高踭鞋，戴住腰封，畀一眾男dancer抬高抬低，仲有拗晒腰嘅動作，佢話之前練舞時因為未習慣，唔小心拉傷背脊條筋，所以要戴腰封保護吓。
自比鋼胸唔會縮
最近有傳話千嬅想演唱會加場，只因接住個期嘅係衞蘭開演唱會，有傳話因為千嬅同黎明唔妥，所以黎生唔肯讓個期畀佢加場，千嬅聽完之後一頭霧水話：「我個人嚟講，100場同10場我都恨開，但公司通知咗我暫時唔會加場，我哋細路仔唔知大人嘅嘢，只係做好自己嘅本份。」覺唔覺得黎明會唔讓個期出嚟？千嬅就話：「我諗唔會啩，冇咁變態，大家都係同公司。」
千嬅家積極減肥，佢話都減咗成9磅，目標係呢個月減多6磅，問佢個胸有冇縮水？千嬅即自嘲：「我呢啲鋼胸，唔會有乜進展，減肥又唔會點縮，係咁大就咁大。」千嬅話排舞最大壓力就係踩住啲男dancer嘅背脊，佢話：「點解要咁努力減肥，就係怕踩親人囉！你知男人條大『陣』好緊要o架嘛，唔想壓親人囉！」