辛苦搵嚟自在食，唔理教授定地盤工人，畀得起錢就應該有飯開，不過有位地盤哥仔最近係網上申訴，自己喺城大嘅建築地盤開工，有日喺飯堂食飯時，有手足情不自禁講咗幾句粗口，有教授唔啱聽呢啲勞動人民語言，向校方投訴，之後工友就不能入飯堂開飯，質疑校方歧視工人。
八方問城大點解咁離譜，公關答得好有趣，指飯堂首要服務對象係學生同教職員，學校有安排飯盒畀喺城大工作嘅建築工人，至於有冇阻止工友入飯堂？公關話冇補充。
有城大學生話，噚日見到有貌似地盤工友係canteen食飯，亦有學生指飯堂優先俾師生用天公地道，冇乜唔妥。
民建聯「新劉江華」季霆剛喺網上知道呢件事，喺FB發表精闢見解，建議工友「去Festivalwalk（又一城）lor」，點解佢唔叫工友不食人間煙火呢？