內銀股半年業績大比拼，純利增長以招商銀行（3968）59.8%取勝；民生銀行（1988）卻以2.92%淨息差，及96.2%手續費及佣金之中間收入增幅大獲全勝；論股本回報，農業銀行（1288）之25.1%好得令人有點難以置信。中國銀行（3988）之中間收入增長23.3%跑輸同業，卻以1.52倍預測市賬率攞番彩；相對地，招行之2.73倍預測PB又似乎貴得有道理，因各項主要經營指標均高於行業平均；核心資本充足比率則以工商銀行（1398）的9.41%及農行之6.72%包辦頭尾。
業績差不多等齊，唔等於懸念消退，資金仍流向回報低嘅債券避險，日圓成為今年必勝外幣，有阿太擔心手上嘅歐元，惟有安慰佢120水平即使再見都應該到咗ComfortZone，大不了去歐洲使咗佢。
內地股票基金全見紅
今年投資有幾難做，睇基金半年報就知，上半年內地跑贏同業嘅基金都係靠及時減倉，原來唔係識上車最叻，識跳車嘅仲勁。A股年初至今跌19.4%雖可接受卻不好受，第二季度地產新政會否延續至「金九銀十」，至今仍然是個謎，連基金經理都話睇唔清，散戶又何須扮醒目。內地統計報告指上半年股票方向基金集體虧損。166隻標準股票型基金平均淨值負增長18.51%，普通股票型基金平均蝕15.09%，除固定收益類基金外，其他平均虧損超過10%。
十隻手指有長短，八行業績亦有勝負，優秀嘅基金經理懂得審時度勢之餘，會靠敏銳嘅市場判斷力及時減倉，以減低第二季市場單邊向下行情對投資者造成嘅損失，喺標準股票型基金中，排名第二、三嘅基金分別蝕2.44%及8.89%。當大部份人認為A股估值已屆安全區，上半年跌市卻反映市場對未來經濟走勢嘅擔憂，同下半年上市公司業績增幅回落嘅預期。9月都係去食MoonCake算嘞，因為個市仍然會悶極，季結都係咁話。
胡孟青
作者為獨立股評人