雖然尚未入秋，起碼香港地唔再日日酷熱警告，家中細路又開晒學，爹哋媽咪終可偷閒拍吓拖，揸架開篷超跑遊車河，今日就精選一圓一方兩大超跑名牌你揀。原來買二手車時，Check開篷順唔順只屬其次，最重要係唔好窒波同漏油呀！
記者：徐影龍
攝影：林栢鈞
Model：Betrys@GME、Kitterick
D波上落要夠順
對比波子，林寶散發更濃烈霸王氣勢，直路發力，真的好似頭蠻牛疾衝般有勁。不過Martin提醒，超跑最忌波箱出事，就算爆飛時轉數Keep住好高、波段升得好快，若以D波行駛，都不應出現「窒波」情形，即是轉波時仍然好順暢地洪洪洪爆住上，不會「Chock」，除非轉了+/-波又揸得唔叻。同波子一樣，林寶採用電軟篷設計，不過機械臂同滑輪，望落複雜得多，會唔會易壞？「坦白講，林寶同波子個篷都設計得好好，又唔係咩高科技，邊有咁易壞。不過開閂篷頂都只係約20秒，買車時大可試埋開得順唔順暢，好濕碎，最重要都係Check滲水、有無大撞呢啲指定動作。」
沙灘上一班型男，只敢離遠偷望靚女Model，遇着林寶，卻可厚着臉皮走埋嚟輪流合照，林寶魅力實在太勁。呢架林寶屬Gallardo尾期款，唔算LP型號，勝在年份夠新，仲只行咗三千公里，卻比新車足足平150萬，可算係是十足浮誇、六折找數，幾抵玩呀！
規格
08年出廠、5,200cc、0手數、行車里數約3,000公里
當年新車價：約390萬
二手價：248萬
查詢：FormulaWon（31102718）
粗咪小心漏油
超跑可算是男人夢想，能夠開埋篷更係Dream中之Dream，型爆登場的是Porsche一代名車997Turbo開篷版。灣仔壹號車場專賣上價車，今次找來FormulaWon的Martin，講吓應該點揀二手波子，「Porsche啲嘢本身好襟，尤其年份咁新嘅車，除非上一手實在太「粗咪」，即係每年行成萬幾二萬公里，咁不妨望吓車底有無漏偈油。基本上泊一晚車，偶然漏一、兩滴係好正常，漏咗一灘仔就唔係幾好喇！反而我想講吓揀呢類高價車，盡量搵番黑、白、灰呢類大路顏色，二手價賣番出去都企得硬啲o架！」
開住篷嘆完一轉，天氣稍熱，但架黑魂997勝在夠快，加上波子有着比其他超跑更矯捷的特性，迎風吹面仍令人感覺清爽，經過一個又一個沙灘、望住一個又一個比堅尼靚女，令我更肯定一生人點都要買番架開篷車。
規格
07年出廠、3,600cc、0手數、行車里數約13,000公里
當年新車價：約240萬
二手價：178萬
查詢：VGOMotor（21109900）
