勞工界最肉感一頁今日改寫！三年前職工盟李卓人撐紮鐵工人，除汗衣露出豬腩肉，今時今日勞工界砌最低工資如火如荼，阿人喺立法會講到口水乾、眼濕濕，剝衫呢啲咁艱巨嘅工作惟有交棒畀80後。網界紅人露體狂女博客小丁，最近喺民間團體邀請下剝光豬撐最低工資33蚊，同前香港足球先生李健和、流行曲監製周博賢齊齊上YouTube。
指摘委員會黑箱作業
小丁喺段片入面一如既往以全裸美好身段示人，只係用黑膠紙剪咗「33」兩個數目字遮住兩點，向來關心時事嘅佢，唔滿意臨時最低工資委員會畀商界代表霸住晒，又話家出去食嘢好多時都30幾蚊一個餐，好多人勞碌一個鐘都賺唔到餐飯，「個餐唔係食翅，係魚蛋粉，都換唔到。」佢自己做平面設計師，三餐應該唔太愁，但就擔心第日有啲打工仔女要時薪8蚊去洗碗。
呢段片嘅始作俑者係民間爭取最低工資聯盟葉寶琳，佢之前搵咗周秀娜拍片打頭陣，今次再搵周博賢、李健和、小丁，希望令到更多人明白33蚊嘅重要性，「家喺度傳28蚊，個委員會黑箱作業，出嚟又唔講考慮乜嘢因素，工人未必受惠」。
小丁噚日喺自己個blog同facebook度post咗幾張behindthescene，着住粉紅色上衣嘅Bobo搭住小丁嘅靚靚裸背影咗張合照，網友當然唔放過Bobo，問佢幾時除埋一份。佢唔回應，八方打去再逼迫佢，佢就笑住話有33蚊就除，嘩！係咪先？如果係就真係要全城總動員力爭33蚊！相信整個社運界都熱切期待！
李健和：得20蚊點頂？
至於佬界代表和仔就話，自己比較幸運，退咗休可以喺足球圈度有份教練job撈吓，但就唔係個個都咁好彩，如果兩公婆有個細路，一頭家搵唔到萬零蚊真係好辛苦，33蚊一個鐘計，一個月都係六、七千蚊，交通費、日常用品又貴，和仔話呢個數目真係唔係多。「得20、21蚊你點頂呀？就算33蚊都係叫做好啲，唔係理想呀！」呢度有片睇 http://www.youtube.com/watch?v=SLaIxGxPvMI
mailto:[email protected]