經濟前景睇淡，花旗股市繼續喺近日低位反覆，道指前晚下跌140點收市，勉強守於10000關之上。
期指結算日港股借花旗股市升勢反彈，噚日淡友再度出擊，恒指一度低見20372，晏晝拍地成績理想，港股收復部份失地，恒指下跌200點，報收20536，日線圖現十字星，有反彈條件。噚日賣地成交價較預期為高，如果再過一段短時間政府冇新措施，樓市成交可望回升。
利豐C輪21659：利豐（494）噚日報收39.40元，升2.4%。股價逆市升，成交顯著增加，睇嚟會逐步推向42元，破位睇44元，可以諗吓隻C輪21659。
隻輪現價34.5仙，2011年1月24日到期，行使價40元，溢價11.4%，引伸波幅37%，槓桿率11.4倍（有效6倍），正股升上44元，21659睇62.9仙，有超過8成升幅，如果正股跌穿37.80元就沽咗隻輪止蝕。
俊樺