話咁快，新馬季即將開鑼，今個星期日又去沙田搏殺嘞。沙田馬會會所三樓嘅凱旋廳（三樓）在七月十四日馬季收爐後先至開始全新裝修，呢兩三日已經內部試菜，迎接新馬季，前後四十幾日啫噃，如果我地屋企大裝修，可以做得咁快嘅話，直情還得神落。
二○一○至二○一一年度馬季，有新董事上場，就係前立法會議員李家祥會計師，佢接替退休嘅前主席陳祖澤做馬會董事，新主席就按例由董事年資最長嘅施文信（T.BrianStevenson）接棒，施文信以前係安永會計師行嘅主席，係醫管局主席胡定旭嘅上司，而胡定旭都退休埋咯，可見施文信係幾咁資深。
左丁山在馬場久唔久就會見到李家祥，呢位會計師賭馬永遠輸錢，從來唔知去邊度收錢嘅，點解呢？李老兄話：「左丁山，我買馬嘅注碼好細，中正嘅機率亦好細，一旦命中嘅話，我就將張飛交畀太太，由佢收錢袋埋，所以佢陪我嚟馬場，只識收錢，我就一定有出冇入！」嘩，咁乖嘅丈夫，去邊度搵，唔怪得李太入馬場，成日都咪咪嘴笑！
另外一位經常展示笑容嘅，會係在馬場不見蹤影好多年嘅榮譽董事李國能，李官自掌管終審法院後，退出馬會董事會，唔做馬主，如果唔係主持頒獎禮嘅話，就馬場都唔入。今年佢退休嘞，已向傳媒公開表示佢會多啲享受賽馬養馬，以後可能經常在馬場與李官碰頭。
馬圈中人之歇暑期愈來愈短，周圍撲就更緊張，馬主N在北海道參加日本馬拍賣會返嚟住屋企一晚，第二朝又撲去澳洲紐西蘭，捉住佢問日本育馬、拍賣馬情況如何，佢話睇中三匹Stravinsky靚馬，可惜過唔到體檢，只得作罷，日本育馬業正生存在矛盾當中，一方面日本有啲靚馬如DeepImpact（大震撼）、Stravinsky在日本配種，配種費甚昂貴，但另方面日本經濟長期不景，唔係有幾多日本馬主願出高價買周歲馬，故此日本育馬者好想打開海外市場，希望首先在香港尋求突破，有興趣嘅香港馬主，可以當係旅行到北海道參加拍賣會，吼番一兩匹平靚正嘅新馬。