過去一個禮拜，港人都好傷感，包括噚日lastday嘅康泰旅行社總經理劉美詩（Susanna）。佢1978年讀完書就入康泰，初時做領隊，所以對領隊謝廷駿（Masa）遇難有切膚之痛。Su姐兩、三個月前決定離職，諗住開開心心完成32年旅業生涯：「可惜帶住一個遺憾離開。」
工作上Su姐拎得起、放得低，但始終牽掛舊同事，所以押後去上海世博行程，參加埋聽日Masa個追思會，周五才到上海會合家人。「之前成日做嘢，冇時間陪家人。」9月5號又會趕返香港出席謝嘅葬禮，「完成埋呢件事，正式離開旅遊業。」
稍後去城大做導師
外界揣測劉美詩去向，佢堅稱暫冇長遠計劃，稍後會去城大做導師教marketing一個學期。50歲嘅Su姐真正由低做起，年僅27歲就做總經理，相信有唔少管理、公關實戰經驗傳授學生。今次事件中，Su姐處變不驚，甚有大將風範，事發後佢戴大大粒珠鏈開記招，招來批評，佢從善如流即改，好多前線員工喺網上撐佢。太子黃進達今日接班，珠玉在前，八方希望青出於藍啦。