可能擇錯日或者出門前冇睇星座運程，財爺鬍鬚曾首次官式訪台頻頻蝦碌，去誠品聽到首《DonaldTsang,pleasedie》，見陸委會主席賴幸媛又被叫搞革命、起義，噚日行程尾聲，原定同行政院長吳敦義會面，又因三個颱風吹向台灣，吳敦義要陪馬英九視察防風措施而緣慳一面。遭台方三戲，鬍鬚曾都無可奈何，噚日話見唔到吳敦義，不在佢控制範圍，總之客隨主便啦。
誠品有機會落戶香港，港台商貿合作委員會主席李大壯同老闆吳清友傾過，佢引述吳清友稱，香港租金勁貴，粗略計數，要賣出裝滿九架貨van嘅書，即係以萬計嘅書，先夠交一呎租。八方冇寫錯，係一呎，如果書店佔地30,000呎，要賣幾多書先維到皮呢？八方唔識計，難怪鬍鬚曾一味lipservice啦。