特首煲呔早前巡地盤，視察建造業就業情況，日日坐冷氣房嘅高官，落到地盤卻講風凉話，話自己坐冷氣房都要受氣，日曬雨淋工人聽到，唔打佢算好EQ。建造業議會為咗顯示做地盤有「錢」途，噚日開記招宣傳，指熟手工人月入隨時一、兩萬蚊，總監黃敦義更特別去自動櫃員機，㩒咗兩萬蚊現金出嚟，記者會上手持真金白銀畀記者影相。
如果開足工，又冇俾無良僱主、判頭拖糧，八方相信做地盤都應該係唔錯職業，不過做建造業議會總監應該更好。黃敦義係前警務處助理處長，退休後空降建造業議會前身建造業訓練局，據講月薪逾11萬元。佢07年上任，去年續約，半途出家入建造業，一樣好「錢」途。