9月啦，小妹至愛嘅大閘蟹又上巿，唔少酒店搶先推大閘蟹宴，雖然家啲蟹仲未係最肥美，食先頂吓癮都好。城景國際酒店樂雅軒呢個月13日起推出大閘蟹宴，至少兩位起。酒店PR姐姐Kathy話，主打當然係紫蘇大閘蟹，「啲蟹主要嚟自陽澄湖，每人有兩隻，每隻足四両」。
另一道菜叫脆煎蟹肉盞，係將蟹肉混入經油炸嘅麪包粒、沙葛粒等，再沾麪包糠炸到金黃；蟹粉扒玉子豆腐，做法先將大閘蟹蒸熟起肉起膏，加薑粒爆香做蟹粉，再配上自家製嘅玉子豆腐，其他菜式包括凉拌花膠絲、海皇酸辣湯、帶子乳鴿脯等。套餐每位$328，facebook粉絲可以喺網址 http://www.facebook.com/thecityviewhk下載優惠券，有85折同獲贈一壺花雕。
Kathy補充話，6號起會率先推出6位或12位用嘅中秋大閘蟹全包宴，價錢$1,988同$3,888，「畀家庭客食大閘蟹慶中秋團圓」。查詢：27833286。
自助晚餐 唔使拆蟹
諾富特東薈城酒店Essence都唔執輸，即日起推出潮食蟹自助晚餐，酒店公關Josephine話，自助餐賣點係唔使啲客拆蟹咁辛苦，主打三文魚蟹粉意式雲吞，將大閘蟹蟹黃加埋蟹肉、三文魚等做餡料嚟包雲吞，其他仲有蟹肉芝士梳乎厘、蟹肉湯、蟹餅等，價錢每位$188起。客人喺 http://www.facebook.com/novotelcitygatehk下載優惠券，周一至四光顧可獲贈18厘米長嘅壽司（查詢：36028808）。
電郵：mailto:[email protected]
