政改方案通過後，投票支持方案嘅民主黨評分上升，港大民意研究計劃喺8月17日至20日訪問近千位市民，發現民主黨評分由5月中公投過後嘅46.6分升至49.7分，由原來第五位跳升兩級至第三，僅在排名第一嘅職工盟以及第二嘅工聯會之後。而喺政改方案上投票取向同民主黨相反嘅公民黨，評分亦一樣有大幅增長，由原來44.5分升至48.9分，由第七位升到第五位，排喺以49.2分位列第四嘅支聯會之後。
同樣係投反對票，社民連就同公民黨命運迥異，評分較公投後足足跌咗3分，以33.6分排喺榜末，除微跌0.3分嘅前綫外，係唯一評分下跌嘅政黨，社民連唔知會點樣演繹呢啲數字？