成名要趁早，愛國亦然。梁振英接受香港電台節目《中國點點點》訪問時透露，自己喺英皇書院讀中五時，已經反思點解中國喺近代史中受到列國屈辱，自言愛國思想早在中學時期已經萌芽。
當年接受殖民地奴化教育庶受荼毒，咁早就踏上愛國路，梁振英都算「老愛國」了，後來去英國留學，繼續愛國愛黨。74年做留學生時，同華僑留學生組成中國同學會，經常向中國駐倫敦大使館借電影播放，晚黑又暢論國是。
學成回港後，梁振英返內地首次提供專業服務，佢話當年北上好緊張，「當年喺羅湖過關返大陸，過關櫃位會有兩個人：一個係入境處職員，另一個就係港英政府政治部人員。嗰啲政治部人員睇見我哋一群專業人士，周末捧住一大堆文件去內地做義工，都覺得好奇怪。」訪問今日下午3點45分喺港台第一台播出。