人稱肥平嘅前民政事務局局長何志平，噚日以籌委會主席身份，出席有關《易經》嘅國際研討會記者會，肥平話行醫同做官時，《易經》都幫到佢，令佢明白好多事都係一個循環，贏嘅時候唔使贏盡，輸亦唔會輸晒嘅，「有啲嘢焉知非福」，似在暗示慶幸被煲呔踢走。年僅61歲，肥平卻已經退休，家陣閒時做慈善、文化推廣活動，八方見佢心廣體胖，顯然樂得逍遙。
肥平雖然係番書仔，但佢話細路仔已經睇四書五經，當時睇唔明，喺外國讀書時睇英文版《易經》，雖然只係一知半解，不過已受用無窮，記住人生有高有低，一定會有翻身一日。佢透露年底會搞客家文化節。