日本足總禮拜一終於宣佈，由前AC米蘭教練沙哲朗尼（圖）擔當新一任國家隊教頭。不過，喺正式公佈人選之前，事情可謂峯迴路轉，連日本傳媒都搞到亂晒龍。有傳媒禮拜一最早報道，指前阿根廷國家隊掌舵人比格文會成為岡田武史嘅繼任人，但到咗黃昏時段，《讀賣新聞》同意大利傳媒突然報道，沙哲朗尼先至係新任日本教頭，仲會簽約兩年㖭。當時，日本足總對於兩種說法都不願置評，因為除咗比格文同沙哲朗尼外，朗奴高文、尹巴士頓同鹿島鹿角教練奧利華拉都係候選人，結果日本足總之後先喺官方網站，正式公佈沙哲朗尼先至係真命天子，過程都幾戲劇化。